कार्यालय / सुमन पोखरेल
- सुमन पोखरेल
- Feb 3, 2015
- 1 min read
कार्यालयभित्र
धर्तीको सर्वाधिक मूल्यवान् भएर पनि
शासकद्वारा
बाढीको बर्सात्झैँ सस्तो ठानिएको
जनताका पसिनाले बनेका दराजहरू छन् ।
दराजभित्र छन्,
नोकरको जागिर खाएर मालिक भएकाहरूका
बदनियत र असक्षमता गनाउने फाइलहरू।
जहाँ हाम्रा कमजोरीका तुनाले बाँधिएको
एउटा वीभत्स इतिहास छ,
हाम्रा निर्लज्जताले लेखिइँदै गरेको
एउटा लाटो वर्तमान छ,
एउटा छरिपस्ट भविष्य छ।
के तपार्इँलार्इ थाह छ,
त्यो कार्यालयको नाम
सिँहदरवार हैन भने
के होला?
....................................
असोज २०६२, विराटनगर
...................................
Comentarios