मनफूलको तरेली सुमसुम्याए झैँ / सुमन पोखरेल
मनफूलको तरेली सुमसुम्याए झैँ
कसले यो के गर्यो माया लाए झैँ
खोला आज गीत गाउँदै बगे जस्तो
हावा पनि सङ्गीत हाली बहे जस्तो
कहाँ कहाँ मेरै नाम गुनगुनाए झैँ
कसले यो के गर्यो माया लाए झैँ
ढुङ्गो पनि फक्रिएर झुले झुले जस्तो
ढुङ्ग्यानमा जताततै फूलै फुले जस्तो
बेलै नभई एकाएक बसन्त आए झैँ
कसले यो के गर्यो माया लाए झैँ
मन छेऊ आई कतै बैँश बोले जस्तो
कसले कसले मनको ढोका खोले जस्तो
नेपथ्यमा कताकता प्रीत मगमगाए झैँ
कसले यो के गर्यो माया लाए झैँ
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...