मसँग बदनाम आयो / सुमन पोखरेल
जीवनभर नभुल्ने, मायाको ईनाम आयो
सग्लो दिएँथेँ मुटु, चर्केर दस ठाम आयो
सोधे मलाई कारण, मेरो मलिनताको जब
शुष्क ओठमा अनायस तिम्रो नाम आयो
चर्किरहन्छ हृदय, सधैँ जोडिरहन्छु म
प्रेमको उपहार स्वरूप यो के काम आयो ?
व्यर्थै लेखेँछु गजल, प्रेमको रङ्गमा डुबेर
अदृष्य रह्यौ तिमी, मसँग बदनाम आयो
के राख्छौ फूल तिमी मेरो तसवीरमा ऐले
थाह छ मलाई, कोको, मेरो मलाम आयो
कहाँ पठाऊँ जवाफ यत्रो संसारमा सुमन !
कसले पठायो कुन्नी, एक चिट्ठी बेनाम आयो
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...