बिझाए भनेर / सुमन पोखरेल

तारा गन्दै कति रात बिताए परेला कति भिजाए भनेर

नसोध यी आँखाहरूलाई कति रोए कति निदाए भनेर

पराईहरूका बोलीमा काँडा, आफन्तका व्यवहारमा ढुङ्गा

के भन्नु यहाँ मान्छेहरू, मनभरि कति बिझाए भनेर

हराएको हो संवेदन, वा बेचिदियो मान्छेले

भनेर साध्य छैन, कविलाई कति खिज्याए भनेर

केही कटाक्ष वाण झैँ चले, केही नजर झुकेर बोले

हिसाब छैन कति आँखा रिसाए, कतिले रिझाए भनेर

मैदानमा एक बलि चढे, शहीद भए उन्मुत्ति दिलाउन

कसले भन्ने कैदमा कति दु:ख पिए कति कोर्रा खाए भनेर

भोगिरहेछु, भोगिरहेछु, भोगिरहेछु, नसुनाऊ

बाघ हामीले मारेपछि सत्तामा ब्वाँसा कसरी आए भनेर

खुल्न चाहे थुन्न खोज्छन् लुक्न खोजे तमासा बनाउँछन्

के भन्नु सुमन ! मै मर्दा पनि कति हल्ला फिँजाए भनेर

#SumanPokhrel #नपलगजल #समनपखरल