धड्कनको चाल अर्कै छ / सुमन पोखरेल
हिजोजस्तो छैन धड्कनको चाल अर्कै छ
उनलाई भेटेदेखि मनको हाल अर्कै छ
छट्पटिन्छ, उफ्रिन्छ, निस्कन खोज्छ हृदय
आँखाले हो देखेको उनलाई, बेहाल अर्कै छ
मन लगिन्, मुटु लगिन्, ज्यूँदो छु तै पनि
मायाको संसारमा, शायद काल अर्कै छ
जीवनभर नाचेकै हो, अझै नाचिदिन्थैँ
तर तिम्रो मञ्चको सुरताल अर्कै छ
मेरो प्रेम मेरै उपहारमा बाँधी फाल्यौ कि
देख्छु आज तिम्रो हातमा रुमाल अर्कै छ
नखोज् तँ आँसु सुमन ! परेलीका छेउमा
छातीभित्र कतै मेरा बहको ताल अर्कै छ
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...