तिमी याद आयौ / सुमन पोखरेल
यो मन जल्दा पनि तिमी याद आयौ
मुटु नचल्दा पनि तिमी याद आयौ
मेरो बेहोशीले कहिल्यै पूर्णता पाएन
संसारै भुल्दा पनि तिमी याद आयौ
देखिनँ केश, आँखा, ओठ तिम्राजस्ता कतै
तर केही नमिल्दा पनि तिमी याद आयौ
मायाको पर्दाले छेकेथ्यो संसार पहिले
आज पर्दा खुल्दा पनि तिमी याद आयौ
तिमी टाढा भयौ, काँडा बिझाएर मनमा
तर फूल फुल्दा पनि तिमी याद आयौ
तिमीलाई भुल्न मैले मर्नै पर्यो तर
चिता जल्दा पनि तिमी याद आयौ
किन मरिमेट्नु सुमन, कसले भन्छ र !
तैँले ज्यानै फाल्दा पनि ‘तिमी याद आयौ’
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...