चोट भरूँ म पहिले / सुमन पोखरेल
यसकै वेदनामा दुखूँ म पहिले
अरू लेख्दै गरुँला प्रेम लेखूँ म पहिले
रात बाँकी नै छ, छ जीवन पूरै बाँकी
एकछिन घुम्टोभित्रै हेरूँ म पहिले
चाहना छ प्रवल, आकाश छुने तर
गरूँ केही अनुभव, थोरै बगूँ म पहिले
बोक्ने छु म तँलाई, नडरा तँ जिन्दगी
दुईचार पाइला दह्रा टेकूँ म पहिले
रङ्ग्याउनेछु तिमीलाई मायाका हर रङ्गले
प्रेमको चित्रकारी सिकूँ म पहिले
आलैकाँचै रहियो भने, दु:ख होला उता
शीत-ताप जीवन कै, सहूँ म पहिले
रहरैले मात्र के लेखिएला र सुमन !
यो छातीमा केही चोट भरूँ म पहिले
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...