परिचयपत्र \ महमुद दरविस
लेख!
म एउटा अरबी हुँ
र मेरो परिचयपत्र नम्बर पचास हजार हो
मेरा आठ जना छोराछोरी छन्
र नवौँ यो बर्खा सकिएपछि जन्मिँदैछ
के तिमी रिसाउँछौ?
लेख!
म एउटा अरबी हुँ
अरू साथीसँगै ढुङ्गा खानीमा काम गर्ने।
मेरा आठ जना छोराछोरी छन्
म तिनीहरूका लागि खाना लुगा र किताबहरू
तिनै ढुङ्गाबाट बटुल्छु।
म दयाको भीख माग्दै तिम्रा ढोकामा पसारो पर्दिनँ।
न त आफूलाई तिम्रा अफिसका खुड्किलामा खुम्च्याउन चाहन्छु।
त्यसो हुँदा के तिमी रिसाउँछौ?
लेख!
म एउटा अरबी हुँ।
मेरो एउटा नाम छ, कुनै पद बिनाको
र नागरिकहरूलाई कुद्ध पारिएको एउटा देशमा
प्रतिलिपी अधिकार सुरक्षित गरिएको छ, त्यस नामको।
दर्होसँग गाडिएका छन् मेरा जरा
समय जन्मनुभन्दा पहिल्यैदेखि ,
युगहरूका ढोका खुल्नुभन्दा पहिल्यैदेखि,
सल्ला र सालका रूखहरूभन्दा पहिल्यैदेखि,
र घाँस उम्रन थाल्नुभन्दा पहिल्यैदेखि।
मेरा बुवा, कुनै सम्भ्रान्त परिवारमा हैन
हलो जोत्दै हुर्किनु भएको हो।
मेरा हजुरबा किसान हुनुहुन्थ्यो,
न त राम्रोसँग बढ्न पाउनु भयो, न त राम्ररी जन्मनु नै भयो!
वहाँले मलाई पढ्न सिकाउनुभन्दा पहिले
मलाई सूर्यको गौरवका बारेमा बुझाउनु भयो।
मेरो घर एउटा पालेघर जस्तै छ
बाँसका सिक्रा र रुखका हाँगाले बनेको।
के मेरो अवस्थाले तिम्रो चित्तलाई तृप्त पार्यो?
मेरो एउटा नाम छ, कुनै पद बिनाको!
लेख!
म एउटा अरबी हुँ।
तिमीले चोरेका छौ
मेरा पुर्खाहरूको खेतबारी
मैले बाली लगाएको मेरो धर्ती
र मेरा छोराछोरीसमेत।
तिमीले हाम्रा लागि केही पनि बाँकी राखिदिएनौ
यी ढुङ्गाहरू बाहेक।
र यो पनि राज्यले लानेछ भन्ने सुनिँदैछ अचेल।
त्यसैले!
पहिलो पृष्ठको सबैभन्दा माथि लेख -
मानिसलाई घृणा गर्दिनँ म
न त म अरूको सम्पत्ति हडप्दै हिँड्छु।
तर म भोकाएँ भने
मेरो सम्पत्ति बलजफ्ति हडप्नेहरूको मासु नै मेरो आहार हुनेछ।
सावधान...
सावधान रहू...
मेरो भोक र
मेरो रिसबाट।
..........................................................
सुमन पोखरेलद्वारा अङ्ग्रेजीबाट अनूदित
..........................................................
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...