पाप \ फरोग फारुख्जाद
न्यानो, तप्त अँगालामा समाहित भएर
असीम आनन्दले भरिपूर्ण एउटा पाप गरेँ मैले।
उन्मत्त, आक्रामक, र इस्पातझैँ बलिष्ठ पाखुरामा बाँधिएर
मैले एउटा पाप गरेँ।
त्यस अँध्यारो, मौन एकान्तमा
मैले रहस्यले भरिएका उनका आँखामा हेरेँ
चाहनाले व्याकुल उनको हेराइको मात लागेर
मेरो मुटु लरखराउँदै
छातीभित्रै बेलगाम धड्कियो।
त्यस अँध्यारो, मौन एकान्तमा
म उनीमै लपक्क टाँसिएँ
उनका ओठले मेरा ओठमा उत्तेजना खन्याए
म मेरो व्याकुल हृदयका तमाम पीडाबाट बाहिरिएँ।
मैले उनका कानमा प्रेमील वाक्यमा साउती गरेँ-
ए!मेरो जीवन, म तिमीबाट छुट्टिन सक्दिनँ
म तिमीबाट अलग्गिन सक्दिनँ, ए!जीवनदायी अँगालो,
ए!मेरो आशक्त प्रेमी!
उनका आँखामा आशक्तिको ज्वाला दन्कियो
उनको हेराइको मदिरा छमछम नाच्न थाल्यो
मखमली ओछ्यानमाथि मदमत्त भएर
मेरो शरीर उनको छातीमाथि मडारियो।
बेजोडको मच्याइ र शिथिलताबीच
असीम आनन्दले भरिपूर्ण एउटा पाप गरेँ मैले।
हे ईश्वर, भन्न सक्दिनँ,
त्यस अँध्यारो, मौन एकान्तमा
खै मैले के गरेँ !
..........................................................
सुमन पोखरेलद्वारा अङ्ग्रेजीबाट अनुदित
..........................................................
Forough Farrokhzad translated into Nepali by Suman Pokhrel
…………………………………………………………………………………………
This translation was first published on Nepali Kalasahitya Dot Com
……………………………………………………………………………………………...........
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...