विशिष्ट नारी / माया एन्जोलो
मेरो रहस्य कहाँ चैँ लुक्या होला भनेर छक्क पर्ने गर्छन् सुन्दर नारीहरू ।
म चिटिक्क परेकी वा फेसन मोडेल बन्न ठिक्क हुनेगरी बनेकी छुइनँ ।
तर मैले सुनाउँदा
कुरा बनाएको भन्ठान्छन् तिनीहरू ।
म भन्ने गर्छु,
यो मेरा पाखुराले भेट्ने ठाउँमा छ
मेरो नितम्बको चौडाइमा छ,
मेरा पाइलाका लम्क्याइहरूमा छ
मेरा ओठका चालहरूमा छ ।
नारी हुँ म
विशिष्ट रूपले ।
विशिष्ट नारी,
म नै हुँ।
तिमीले सोच्नसक्ने जत्तिकै शालिनताले
म कोठाभित्र पस्छु,
पुरुषहरू भएठाउँमा पुग्छु ,
तिनीहरू कि त सतर्क हुन्छन्
कि त घुँडा टेक्छन्।
मौरीले रानो धेरेझैँ
मेरा वरिपरि घुम्छन् तिनीहरू ।
म भन्नेगर्छु,
यो मेरा आँखाको आगो हो,
मेरा दाँतको चमक हो,
मेरो कम्मरको लचक हो
र मेरा गोडाको उमङ्ग हो ।
म एउटी नारी हुँ
विशिष्ट रूपले।
विशिष्ट नारी
म नै हुँ।
तिनीहरू के देख्छन् ममा भनेर
आफैँ छक्क छन् पुरुषहरू।
अनेकौँ कोसिसले पनि
छुन सक्दैनन्
मेरो भित्री रहश्यलाई तिनीहरू।
देख्नै सकेनौँ भन्छन्
मैले तिनीहरूलाई देखाउन खोज्दा पनि ।
म भन्ने गर्छु,
यो मेरो पिठ्यूँको सुडौलतामा छ
मेरो मुस्कानको उज्यालामा छ
मेरा उरोजको उभारमा छ
मेरो स्वभावको शालिनतामा छ
म एउटी नारी हुँ।
विशिष्ट रूपले
विशिष्ट नारी
म नै हुँ ।
अब बुझ तिमी
किन सिँगारिएको छैन मेरो केश।
ठूलो स्वरमा बोल्दिनँ म, दौडिएर हिँड्दिनँ
न त बेस्सरी कराउनु नै छ मलाई ।
मलाई हिँड्दै गरेको देख्दा
गौरवान्वित हुन्छौ तिमी ।
म भन्ने गर्छु,
यो मेरा पैतालाको टेकाइमा छ,
मेरा केशका घुङ्ग्र्याइहरूमा छ
मेरा हत्केलाहरूमा छ,
मेरो ममत्वमा छ,
किनभने, म एउटी नारी हुँ
विशिष्ट रूपले।
विशिष्ट नारी
म नै हुँ।
.........................................................................
Translated from English by Suman Pokhrel
.........................................................................
Maya Angelou translated into Nepali by Suman Pokhrel
...............................................................................................
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा करैले, पूरा वा आधा सुन्नुहुने, अथवा सुन्दै नसुन्नुहुने शब्दहरूक