हाम्रा डरहरू / आरती तिवारी
घरबाट निस्कने बितिक्कै
भीडमा हराइएला भन्ने डर,
राम्रा लुगा लगाउँदा
अरूको आँखा लाग्ने डर,
साधारण पहिरनमा हिँड्दा
आम मान्छेझैँ देखिइएला भन्ने डर ।
पहिलो हुँदा
साथीहरूले डाह गर्ने डर,
औसत हुँदा
पछाडि परिने डर,
प्रेम प्रस्ताव गर्दा
अस्वीकार होला भन्ने डर ।
ब्रान्डेड सामान भनेर ठगिइने डर,
सस्तो खोज्दा
माल कमसल पर्ने डर,
कागजातहरू नक्कली हुन सक्ने डर ।
बाढी र खडेरीका कारण
बजारमा मन्दी छाउने डर,
मन्दीमा बेरोजगार होइएला भन्ने डर ।
हाम्रा छरिता डरहरू
मोटा हुँदै जाँदैछन् अचेल।
विष्फोट गर्न थाल्या छन्
दवावलाई
हाम्रा डरहरूले ।
हामीलाई चाहिएको छ एउटा मसिहा
जसले बदलिदियोस् दुनिया,
खुसीको बाली फलाएर
बनाइदेओस् स्वर्ग,
भेटियोस् कुनै जादूको छडी
र पलभर मै होउन् सजिला
सबै बाटाहरू ।
हराऊन् हाम्रा डर ।
गर्दैनौँ कोशिस हामी
आफैँलाई बदल्ने कहिल्यै
र ढाँटेर आफैँलाई
डराइरहन्छौँ सधैँ ।
........................................................
हिन्दीबाट सुमन पोखरेलद्वारा अनूदित
........................................................
Arti Tiwari translated into Nepali by Suman Pokhrel
Related Posts
See Allमैले लेख्न शुरू गरेको, र तपाईँले पढ्न थाल्नुभएको अक्षरहरूको यो थुप्रो एउटा कविता हो । मैले भोलि अभिव्यक्त गर्ने, र तपाईँले मन लगाएर वा...